Τοῦ ἐν ἁγίοις πατρὸς ἡμῶν Συμεὼν εὐχὴ μυστικὴ, δι᾿ ἧς ἐπικαλεῖται τὸ Πνεῦμα τὸ Ἅγιον ὁ αὐτὸ προορῶν

Ἐλθὲ τὸ φῶς τὸ ἀληθινὸν, 

ἐλθὲ ἡ αἰώνιος ζωὴ, 

ἐλθὲ τὸ ἀποκεκρυμμένον μυστήριον, 

ἐλθὲ ὁ ἀκατονόμαστος θησαυρὸς, 

ἐλθὲ τὸ ἀνεκφώνητον πρᾶγμα, 

ἐλθὲ τὸ ἀκατανόητον πρόσωπον, 

ἐλθὲ ἡ ἀΐδιος ἀγαλλίασις, 

ἐλθὲ τὸ ἀνέσπερον φῶς, 

ἐλθὲ πάντων τῶν μελλόντων σωθῆναι ἡ ἀληθινὴ προςδοκία, 

ἐλθὲ τῶν κειμένων ἡ ἔγερσις, 

ἐλθὲ τῶν νεκρῶν ἡ ἀνάστασις, 

ἐλθὲ ὁ δυνατὸς, ὁ πάντα ᾀεὶ ποιῶν καὶ μεταποιῶν καὶ ἀλλοιῶν μόνῳ τῷ βούλεσθαι! 

ἐλθὲ ὁ ἀόρατος καὶ ἀναφὴς πάντῃ ἀψηλάφητος, ἐλθὲ ὁ ᾀεὶ μένων ἀμετακίνητος καὶ καθ᾿ ὥραν ὅλος μετακινούμενος καὶ ἐρχόμενος πρὸς ἡμᾶς τοὺς ἐν τῷ ᾅδη κειμένους, ὁ ὑπεράνω πάντων τῶν οὐρανῶν, ἐλθὲ τὸ περιπόθητον ὄνομα καὶ θρυλούμενον, λαληθῆναι δὲ παρ᾿ ἡμῶν, ὅπερ εἷς, ἢ γνωσθῆναι, ὁποῖος ἢ ποταπὸς, ὅλως ἡμῖν ἀνεπίδεκτον. 

Ἐλθὲ ἡ αἰώνιος χαρὰ, 

ἐλθὲ τὸ στέφος τὸ ἀμαράντινον, 

ἐλθὲ ἡ πορφύρα τοῦ μεγάλου Θεοῦ καὶ βασιλέως ἡμῶν, 

ἐλθὲ ἡ ζώνη ἡ κρυσταλλοειδὴς καὶ διάλιθος, 

ἐλθὲ τὸ ὑπόδημα τὸ ἀπρόσιτον, 

ἐλθὲ ἡ βασίλειος ἁλουργὶς καὶ αὐτοκρατορικὴ ὄντως δεξιά! 

ἐλθὲ, ὃν ἐπόθησε καὶ ποθεῖ ἡ ταλαίπωρός μου ψυχὴ, 

ἐλθὲ ὁ μόνος πρὸς μόνον, ὅτι μόνος εἰμὶ, καθάπερ ὁρᾷς! 

ἐλθὲ ὁ χωρίσας ἐκ πάντων καὶ ποιήσας με μόνον ἐπὶ τῆς γῆς, 

ἐλθὲ ὁ γενόμενος πόθος αὐτὸς ἐν ἐμοὶ καὶ ποθεῖν σε ποιήσας με, τὸν ἀπρόσιτον παντελῶς! 

ἐλθὲ ἡ πνοή μου καὶ ἡ ζωὴ, 

ἐλθὲ ἡ παραμυθία τῆς ταπεινῆς μου ψυχῆς, 

ἐλθὲ ἡ χαρὰ καὶ ἡ δόξα καὶ ἡ διηνεκής μου τρυφή.

Πηγή